རྩྭ་ཐང་གི་བཅའ་ཁྲིམས་ཁྲིམས་སྲོལ་ཤེས་བྱ། ༢
ཡིག་ཆ་སྤེལ་བའི་དུས་ཚོད།:2014-09-09   རྩོམ་གྱི་ཡོང་ཁུངས། མཚོ་སྔོན་བོད་སྐད་རྒྱང་བསྒྲོགས་བརྙན་འཕྲིན་ཁང་།

རྩྭ་ཐང་བདག་དབང་དང་བེད་སྤྱོད་དབང་ཆ་བསྒྱུར་ན་ཁྲིམས་ལྟར་འགྲོ་ལུགས་གང་དག་བསྒྱུར་དགོས།

རྩྭ་ཐང་བདག་དབང་དང་བེད་སྤྱོད་དབང་ཆ་བསྒྱུར་ན། སྔར་གྱི་ཐོ་འགོད་ལས་ཁུངས་སུ་རྩྭ་ཐང་བདག་དབང་བསྒྱུར་བའི་ཐོ་འགོད་འགྲོ་ལུགས་སྒྲུབ་དགོས། གལ་ཏེ་བདག་དབང་སྒྱུར་བའི་ཐོ་འགོད་མ་བྱས་ཚེ། རྩྭ་ཐང་གི་བདག་དབང་བསྒྱུར་བར་བཅའ་ཁྲིམས་ཀྱི་ནུས་པ་མི་ལྡན་པ་ཡིན། 

མི་གང་དག་གིས་རྩྭ་ཐང་འགན་གཙང་ལེན་བྱས་ཆོག

ཐུན་མོང་ལ་དབང་བའི་རྩྭ་ཐང་ངམ་ཁྲིམས་ལྟར་ཐུན་མོང་དཔལ་འབྱོར་རྩ་འཛུགས་ཀྱིས་བེད་སྤྱོད་པར་གཏན་འཁེལ་བྱས་པའི་རྒྱལ་དབང་རྩྭ་ཐང་དེ་ཐུན་མོང་དཔལ་འབྱོར་རྩ་འཛུགས་རང་ནང་ཁུལ་གྱི་ཁྱིམ་ཚང་ངམ་ཁྱིམ་ཚང་མཉམ་འབྲེལ་གྱིས་འགན་གཙང་ལེན་བྱས་ནས་བདག་གཉེར་བྱས་ཆོག ཐུན་མོང་དཔལ་འབྱོར་རྩ་འཛུགས་རང་ལས་གཞན་པའི་སྡེ་ཚན་ནམ་མི་སྒེར་གྱིས་འགན་གཙང་ལེན་བྱས་ནས་བདག་གཉེར་བྱེད་ན། ཐུན་མོང་དཔལ་འབྱོར་རྩ་འཛུགས་རང་གི་ཁོངས་མིའི་སྡེ་དམངས་གྲོས་ཚོགས་སུ་ཞུགས་པའི་ཚོགས་མིའི་སུམ་ཆའི་གཉིས་ཡན་ཆད་དམ་སྡེ་དམངས་འཐུས་མིའི་སུམ་ཆའི་གཉིས་ཡན་ཆད་ངེས་པར་དུ་འཐད་པ་བྱུང་དགོས་པ་མ་ཟད། ཞང་གྲོང་མི་དམངས་སྲིད་གཞུང་ལ་ཞུས་ནས་ཆོག་མཆན་འགོད་དགོས། 

རྩྭ་ཐང་འགན་གཙང་ལེན་བྱེད་པའི་དུས་བཅད་ལོ་དུ་ཡིན། 

«ཞིང་སྡེའི་ས་ཞིང་འགན་གཙང་ལེན་བཅའ་ཁྲིམས»ཀྱི་གཏན་ཕབ་ལྟར་ན། རྩྭ་ཐང་འགན་གཙང་ལེན་བྱེད་པའི་དུས་བཅད་ལོ་སུམ་ཅུ་ནས་ལོ་ལྔ་བཅུའི་བར་ཡིན། 
 
 འགན་གཙང་ལེན་སྒོས་བདག་གཉེར་བྱེད་པའི་དུས་བཅད་ནང་། འགན་གཙང་ལེན་བྱས་པའི་རྩྭ་ཐང་ལ་ལེགས་སྒྲིག་བྱས་ཆོག་གམ། 

རྩྭ་ཐང་འགན་གཙང་ལེན་སྒོས་བདག་གཉེར་བྱེད་པའི་དུས་བཅད་ནང་། འགན་གཙང་ལེན་སྒོས་བདག་གཉེར་བྱེད་མཁན་གྱི་རྩྭ་ཐང་ལ་ལེགས་སྒྲིག་བྱས་མི་ཆོག ལ་ལར་དངོས་གནས་ལེགས་སྒྲིག་བྱེད་དགོས་ཚེ། ཐུན་མོང་དཔལ་འབྱོར་རྩ་འཛུགས་རང་གི་ཁོངས་མིའི་སྡེ་དམངས་གྲོས་ཚོགས་སུ་ཞུགས་པའི་ཚོགས་མིའི་སུམ་ཆའི་གཉིས་ཡན་ཆད་དམ་སྡེ་དམངས་འཐུས་མིའི་སུམ་ཆའི་གཉིས་ཡན་ཆད་ངེས་པར་དུ་འཐད་པ་བྱུང་དགོས་པ་མ་ཟད། ཞང་གྲོང་མི་དམངས་སྲིད་གཞུང་དང་རྫོང་རིམ་པའི་མི་དམངས་སྲིད་གཞུང་གི་རྩྭ་ཐང་སྲིད་འཛིན་གཙོ་གཉེར་སྡེ་ཁག་ལ་ཞུས་ནས་ཆོག་མཆན་འགོད་དགོས། 

 རྩྭ་ཐང་འགན་གཙང་ལེན་གན་རྒྱར་ནང་དོན་གང་དག་འདུས་པ་ཡིན།

རྩྭ་ཐང་འགན་གཙང་ལེན་སྒོས་བདག་གཉེར་བྱེད་ཚེ། འགན་གཙང་སྤྲོད་བྱེད་མཁན་དང་འགན་གཙང་ལེན་བྱེད་མཁན་ཕྱོགས་གཉིས་ཀྱིས་ཡིག་ཐོག་གི་གན་རྒྱ་འཇོག་དགོས། རྩྭ་ཐང་འགན་གཙང་ལེན་གན་རྒྱའི་ནང་དོན་ལ་ཕྱོགས་གཉིས་ཀྱི་ཁེ་དབང་དང་འོས་འགན། འགན་གཙང་ལེན་བྱས་པའི་རྩྭ་ཐང་གི་མཐའ་མཚམས་དང་རྒྱ་ཁྱོན། གདང་རིམ། འགན་གཙང་ལེན་བྱེད་ཡུན། འགོ་རྩོམ་པ་དང་མཇུག་བསྡུ་བའི་ཟླ་ཚེས། འགན་གཙང་ལེན་བྱས་པའི་རྩྭ་ཐང་གི་སྤྱོད་ཡུལ། ཁ་ཆིངས་དང་འགལ་བའི་འགན་འཁྲི་སོགས་འདུས་ཡོད། 

རྩྭ་ཐང་འགན་གཙང་ལེན་སྒོས་བདག་གཉེར་བྱེད་མཁན་ལ་དབང་ཆ་གང་དག་ཡོད་དམ། འོས་འགན་གང་དག་བསྒྲུབ་དགོས། 

 རྩྭ་ཐང་འགན་གཙང་ལེན་སྒོས་བདག་གཉེར་བྱེད་མཁན་ལ་གཙོ་བོ་གཤམ་གྱི་དབང་ཆ་དག་ཡོད་དེ། གཅིག འགན་གཙང་ལེན་གྱི་གན་རྒྱ་ལས་གཏན་ལ་ཕབ་པའི་ནང་དོན་ལྟར་རང་བདག་གིས་རྩྭ་ཐང་བེད་སྤྱོད་པ་མ་ཟད། དེ་ལས་ཕན་ཁེ་ལེན་པའི་དབང་ཆ་ཡོད། གཉིས། ཐོན་སྐྱེད་བདག་གཉེར་གྱི་རང་བདག་དབང་ཆ་དང་ཐོན་རྫས་བཀོད་སྒྲིག་བྱེད་དབང་། ཁེ་འབབ་ཐོབ་པའི་དབང་ཆ། བཤུག་སྤྲོད་བྱེད་དབང་བཅས་ཡོད། གསུམ། འགན་གཙང་ལེན་བྱས་པའི་རྩྭ་ཐང་དེ་ཁྲིམས་ལྟར་བསྡུ་སྤྱོད་དང་འཛིན་སྤྱོད་བྱེད་དུས། སྐྱིན་ཚབ་ཐོབ་པའི་དབང་ཆ་ཡོད། བཞི། རྩྭ་ཐང་འགན་གཙང་ལེན་གྱི་དུས་ཡུན་ལོངས་རྗེས། ཆ་རྐྱེན་གཅིག་འདྲའི་འོག་ཏུ་སྔོན་གྱི་འགན་གཙང་ལེན་སྒོས་བདག་གཉེར་བྱེད་མཁན་ལ་སྔོན་ལ་དམིགས་གྱིས་འགན་གཙང་ལེན་བྱེད་དབང་ཡོད། ལྔ། རྩྭ་སའི་བཅའ་ཁྲིམས་དང་ཁྲིམས་སྲོལ་དང་འགལ་བ་དང་། རྩྭ་སར་གཏོར་བརླག་བྱེད་པའི་བྱ་སྤྱོད་ལ་ལྟ་སྐུལ་དང་ཐེར་འདོན། གཏུག་བཤེར་བྱེད་པའི་དབང་ཆ་ཡོད་པ་དང་། དེ་མིན་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱིས་གཏན་ལ་ཕབ་པའི་དབང་ཆ་གཞན་པ་སོགས་ཡོད། རྩྭ་ས་འགན་གཙང་ལེན་སྒོས་བདག་གཉེར་བྱེད་མཁན་གྱིས་རྩྭ་སའི་བཅའ་ཁྲིམས་དང་ཁྲིམས་སྲོལ་བརྩི་སྲུང་བྱེད་དགོས་པ་དང་། རྩྭ་ས་སྲུང་སྐྱོབ་དང་འཛུགས་སྐྲུན། འགན་གཙང་ལེན་གན་རྒྱ་ལས་ཁ་ཆིངས་བཞག་པའི་སྤྱོད་ཡུལ་ལྟར་ལུགས་མཐུན་གྱིས་བེད་སྤྱོད་པའི་འོས་འགན་ཡོད། 
  
རྩྭ་ས་འགན་གཙང་ལེན་བྱེད་པའི་དུས་ཡུན་ནང་། བུ་མོ་གནས་འགྲོ་མ་དང་བཟའ་ཟླ་ཐོར་བའམ་ཤི་བའི་བུད་མེད་ཀྱིས་མུ་མཐུད་དུ་རྩྭ་ས་འགན་གཙང་ལེན་བྱས་ཆོག་གམ། 

རྩྭ་ས་འགན་གཙང་ལེན་བྱེད་པའི་དུས་ཡུན་ནང་། བུད་མེད་གཉེན་བསྒྲིགས་རྗེས། སྡོད་གནས་གསར་བ་རུ་འགན་གཙང་ལེན་བྱ་ཡུལ་ས་ཞིང་མ་ཐོབ་ཚེ། འགན་གཙང་སྤྲོད་བྱེད་མཁན་གྱིས་དེས་གཉེན་མ་སྒྲིག་སྔོན་ལ་འགན་གཙང་ལེན་བྱས་པའི་ས་ཞིང་ཕྱིར་ལེན་མི་ཆོག བཟའ་ཟླ་ཐོར་བམའ་ཤི་བའི་བུད་མེད་དེ་སྔར་གྱི་སྡོད་གནས་སུ་འཚོ་སྡོད་བྱེད་པའམ་སྔར་གྱི་སྡོད་གནས་སུ་འཚོ་སྡོད་བྱེད་བཞིན་མེད་ཀྱང་སྡོད་གནས་གསར་བ་རུ་འགན་གཙང་ལེན་བྱ་ཡུལ་ས་ཞིང་ཐོབ་མེད་ཚེ། འགན་གཙང་སྤྲོད་བྱེད་མཁན་གྱིས་དེས་འགན་གཙང་ལེན་བྱས་པའི་ས་ཞིང་ཕྱིར་ལེན་མི་ཆོག 

རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་བརྒྱུད་སྤྲོད་བྱེད་སྟངས་གང་དག་ཡོད། གནད་དོན་གང་དག་ལ་ཡིད་འཇོག་བྱེད་དགོས། 

རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་བརྒྱུད་སྤྲོད་བྱེད་སྟངས་ལ་འགན་ལེན་གཞན་སྤྲོད་དང་བོགས་མར་གཏོང་བ། བརྗེ་སྤོར། བཤུག་སྤྲོད་གཏོང་བའམ་བྱེད་སྟངས་གཞན་པ་སྤྱད་ནས་བརྒྱུད་སྤྲོད་བྱེད་པ་བཅས་ཡོད། བཤུག་སྤྲོད་བཏང་ནས་བརྒྱུད་སྤྲོད་བྱེད་པར་འགན་གཙང་སྤྲོད་བྱེད་མཁན་ལ་འཐད་པ་བྱུང་དགོས་པ་དང་། བོགས་མར་གཏོང་བ་དང་བརྗེ་སྤོར་བྱེད་པ། བཤུག་སྤྲོད་གཏོང་བའམ་བྱེད་སྟངས་གཞན་པ་སྤྱད་ནས་བརྒྱུད་སྤྲོད་བྱེད་པར་འགན་གཙང་སྤྲོད་བྱེད་མཁན་ལ་ཞུས་ནས་སྙན་སེང་ཐོ་འགོད་བྱེད་དགོས། རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་བརྒྱུད་སྤྲོད་བྱེད་པའི་ཕྱོགས་གཉིས་ཀྱི་དོ་བདག་པས་ཡིག་ཐོག་གི་གན་རྒྱ་འཇོག་དགོས་ཤིང་། གན་རྒྱའི་ནང་དོན་ལ་ཕྱོགས་གཉིས་ཀའི་མིང་དང་སྡོད་གནས། བརྒྱུད་སྤྲོད་བྱེད་པའི་རྩྭ་སའི་ས་མཚམས་དང་རྒྱ་ཁྱོན། གདང་རིམ། བརྒྱུད་སྤྲོད་བྱེད་པའི་དུས་བཅད་དང་འགོ་རྩོམ་པ་དང་མཇུག་བསྡུ་བའི་ཟླ་ཚེས། བརྒྱུད་སྤྲོད་བྱེད་པའི་སྤྱོད་ཡུལ། ཕྱོགས་གཉིས་ཀའི་དབང་ཆ་དང་འོས་འགན། བརྒྱུད་སྤྲོད་བྱེད་པའི་རིན་གོང་དང་གཏོང་སྤྲོད་བྱེད་སྟངས། ཁ་ཆིངས་དང་འགལ་བའི་འགན་འཁྲི་སོགས་འདུས་ཡོད། 

རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་བཤུག་སྤྲོད་བྱེད་པར་ཡིད་འཇོག་བྱེད་དགོས་ས་ཅི་ཞིག་ཡོད། 

རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་བརྒྱུད་སྤྲོད་བྱེད་སྟངས་རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་བཤུག་སྤྲོད་བྱེད་པར་བཅའ་ཁྲིམས་ཀྱིས་སྲུང་སྐྱོབ་བྱེད་པ་ཡིན་ལ། རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་བཤུག་སྤྲོད་བྱེད་པར་གཤམ་གྱི་དོན་ཚན་འགའ་ལ་ཡིད་འཇོག་བྱེད་དགོས་ཏེ། གཅིག རང་འཐད་ཡིན་པ་དང་སྐྱིན་ཚབ་ཡོད་པའི་རྩ་དོན་ལྟར་ཁྲིམས་ལྟར་བཤུག་སྤྲོད་བྱེད་དགོས། གཉིས། བཤུག་སྤྲོད་དང་ལེན་བྱེད་མཁན་ལ་ཕྱུགས་ལས་ཐོན་སྐྱེད་གཉེར་བའི་ནུས་པ་ཡོད་པ་མ་ཟད། རྩྭ་ས་སྲུང་སྐྱོབ་དང་འཛུགས་སྐྲུན། འགན་གཙང་ལེན་གན་རྒྱ་ལས་ཁ་ཆིངས་བཞག་པའི་སྤྱོད་ཡུལ་ལྟར་ལུགས་མཐུན་གྱིས་རྩྭ་ས་བེད་སྤྱོད་པའི་འོས་འགན་སྒྲུབ་དགོས། གསུམ། བཤུག་སྤྲོད་བྱེད་སྐབས་འགན་གཙང་ལེན་བྱེད་མཁན་ལ་འཐད་པ་འབྱུང་དགོས། བཞི། བཤུག་སྤྲོད་བྱེད་པའི་དུས་བཅད་དེ་སྔོན་གྱི་འགན་གཙང་ལེན་གན་རྒྱ་ལས་གཏན་ལ་ཕབ་པའི་ལྷག་འཕྲོའི་དུས་བཅད་ལས་བརྒལ་མི་རུང་། 

རྩྭ་སའི་བདག་དབང་དང་བེད་སྤྱོད་དབང་ཆར་རྩོད་གླེང་བྱུང་དུས་ཇི་ལྟར་ཐག་གཅོད་བྱེད་དགོས། 

རྩྭ་སའི་བདག་དབང་དང་བེད་སྤྱོད་དབང་ཆར་རྩོད་གླེང་བྱུང་དུས། དོ་བདག་པ་ཕན་ཚུན་བར་གྲོས་མོལ་བྱས་ནས་ཐག་གཅོད་དགོས། གྲོས་འཆམས་མ་བྱུང་ཚེ་འབྲེལ་ཡོད་མི་དམངས་སྲིད་གཞུང་གིས་ཐག་གཅོད་དགོས། སྡེ་ཚན་བར་གྱི་རྩོད་གླེང་དེ་རྫོང་རིམ་པ་ཡན་གྱི་མི་དམངས་སྲིད་གཞུང་གིས་ཐག་གཅོད་དགོས། མི་སྒེར་བར་དང་། མི་སྒེར་དང་སྡེ་ཚན་བར་གྱི་རྩོད་གླེང་དེ་ཞང་མི་དམངས་སྲིད་གཞུང་ངམ་རྫོང་རིམ་པ་ཡན་གྱི་མི་དམངས་སྲིད་གཞུང་གིས་ཐག་གཅོད་དགོས། དོ་བདག་པས་འབྲེལ་ཡོད་མི་དམངས་སྲིད་གཞུང་གིས་ཐག་བཅད་པར་ཁས་མི་ལེན་ན། ཁྲིམས་ལྟར་མི་དམངས་ཁྲིམས་ཁང་ལ་གཏུག་བཤེར་བྱས་ཆོག རྩྭ་སའི་བདག་དབང་རྩོད་གླེང་ཐག་མ་བཅད་པའི་སྔོན་དུ་ཕྱོགས་གང་དང་གང་གིས་ཀྱང་རྩྭ་སའི་ད་ལྟའི་བེད་སྤྱོད་ཚུལ་བསྒྱུར་མི་ཆོག་པ་དང་། རྩྭ་ས་དང་རྩྭ་སའི་སྟེང་གི་སྒྲིག་བཀོད་ལ་གཏོར་བརླག་བྱེད་མི་རུང་།

རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་ལ་རྩོད་གླེང་བྱུང་དུས་ཇི་ལྟར་ཐག་གཅོད་དགོས། 

རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་ལ་རྩོད་གླེང་བྱུང་དུས་དོ་བདག་པ་ཕན་ཚུན་བར་གྲོས་མོལ་བྱས་ནས་ཐག་གཅོད་དགོས། གྲོས་མ་འཆམས་ཚེ་སྡེ་དམངས་ཨུ་ཡོན་ལྷན་ཁང་དང་ཞང་མི་དམངས་སྲིད་གཞུང་སོགས་གདན་དྲངས་ཏེ་བར་འདུམ་ནས་ཐག་གཅོད་དགོས། དོ་བདག་པས་གྲོས་མོལ་བྱེད་མི་འདོད་པ་དང་བར་འདུམ་དུ་འཇུག་མི་འདོད་པའམ་གྲོས་མོལ་དང་བར་འདུམ་པ་འབྲས་མེད་དུ་གྱུར་ཚེ། འབྲེལ་ཡོད་འགན་གཙང་ལེན་ཁྲུན་གཅོད་ལས་ཁུངས་ལ་ཁྲུན་ཐག་གཅོད་པའི་རེ་འདུན་ཞུ་ཆོག ཐད་ཀར་མི་དམངས་ཁྲིམས་ཁང་ལ་གཏུག་བཤེར་བྱས་ཀྱང་ཆོག 

ཉོ་ཚོང་ངམ་རྣམ་པ་གཞན་དག་སྤྱད་ནས་རྩྭ་ས་ཁྲིམས་འགལ་གྱིས་བཤུག་སྤྲོད་བྱས་ཚེ་འགན་ཅི་ཞིག་ཁུར་དགོས་སམ། 

བཅའ་ཁྲིམས་ལས་གཏན་ལ་ཕབ་དོན། སྡེ་ཚན་ནམ་མི་སྒེར་གང་དང་གང་གིས་ཀྱང་བཙན་བཟུང་དང་ཉོ་ཚོང་། ཡང་ན་རྣམ་པ་གཞན་དག་སྤྱད་ནས་རྩྭ་ས་ཁྲིམས་འགལ་གྱིས་བཤུག་སྤྲོད་བྱས་མི་ཆོག ཉོ་ཚོང་ངམ་རྣམ་པ་གཞན་དག་སྤྱད་ནས་རྩྭ་ས་ཁྲིམས་འགལ་གྱིས་བཤུག་སྤྲོད་བྱས་ནས་ནག་ཉེས་བསགས་པར། ཁྲིམས་ལྟར་ཉེས་དོན་གྱི་འགན་འཁྲི་རྩད་གཅོད་རྒྱུ། ཉེས་ཆད་མི་འབབ་པར་རྫོང་རིམ་པ་ཡན་གྱི་རྩྭ་ས་སྲིད་འཛིན་གཙོ་གཉེར་སྡེ་ཁག་གིས་འགན་དབང་ལྟར་དེར་དུས་བཅད་ནང་ཡོ་བསྲང་བྱེད་དགོས་པའི་འགན་དཀྲི་བ་དང་། ཁྲིམས་འགལ་གྱི་ཐོབ་འབབ་གཞུང་བཞེས་གཏོང་བ་མ་ཟད། ཁྲིམས་འགལ་གྱི་ཐོབ་འབབ་དེའི་ལྡབ་གཅིག་ཡན་དང་ལྡབ་ལྔའི་མན་གྱི་དངུལ་ཆད་གཅོད་དགོས།

རོང་འབྲོག་པའི་རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་ལ་གནོད་སྐྱེལ་བར་འགན་ཅི་ཞིག་ཁུར་དགོས། 

རྩྭ་འཛུགས་སམ་མི་སྒེར་གང་དང་གང་གིས་རོང་འབྲོག་པའི་རྩྭ་ས་འགན་གཙང་ལེན་སྒོས་བདག་གཉེར་བྱེད་དབང་ལ་གནོད་སྐྱེལ་བར། གནོད་སྐྱེལ་མཚམས་འཇོག་པ་དང་སྔར་གྱི་དངོས་པོ་རྣམས་ཕྱིར་སྤྲོད་པ། སྔར་གྱི་རྣམ་པ་སླར་གསོ་བྱེད་པ། གྱོང་གུད་ལ་སྐྱིན་ཚབ་འཇལ་བ་སོགས་དམངས་དོན་གྱི་འགན་འཁྲི་ཁུར་དགོས།

རྒྱལ་ཁབ་ཀྱིས་རྩྭ་སར་ལྟ་ཞིབ་ཚད་ལེན་བྱ་བ་སྤེལ་བའི་དམིགས་ཡུལ་ཅི་ཞིག་ཡིན།

རྩྭ་སའི་སྔོ་ཁེབས་དང་ཐོན་སྐྱེད་ནུས་པ་སོགས་ཀྱི་གནས་ཚུལ་ལ་རྒྱུས་ལོན་དང་ཤེས་རྟོག་བྱེད་པ་ནི་རྩྭ་ས་སྲུང་སྐྱོབ་དང་འཛུགས་སྐྲུན་བྱ་བ་ལེགས་པོར་བསྒྲུབ་པ་དང་། རྩྭ་སའི་ཐོན་ཁུངས་ལུགས་མཐུན་གྱིས་བེད་སྤྱོད་བྱེད་པའི་རྨང་གཞི་ཡིན། གནམ་གཤིས་སོགས་རང་བྱུང་ཆ་རྐྱེན་འགྱུར་ལྡོག་བྱུང་བའི་ཤུགས་རྐྱེན་ཐེབས་པའི་དབང་གིས། རྩྭ་སའི་སྔོ་ཁེབས་དང་རྩྭའི་ཐོན་ཚད་སོགས་གནས་ཚུལ་ཚང་མ་འགྱུར་ལྡོག་བྱུང་དང་འབྱུང་བཞིན་པའི་སྒང་ཡིན། རྩྭ་སར་ལྟ་ཞིབ་ཚད་ལེན་བྱ་བ་སྤེལ་བའི་དམིགས་ཡུལ་ནི་རྩྭ་སའི་གཞི་ཁྱོན་དང་སྔོ་ཁེབས། ཐོན་སྐྱེད་ནུས་པ་སོགས་འགྱུར་ལྡོག་བྱུང་བའི་གནས་ཚུལ་ལ་དུས་ཐོག་དང་ཡང་དག་པའི་སྒོ་ནས་རྒྱུས་ལོན་བྱས་ནས། རོང་འབྲོག་པས་རྩྭ་ས་སྲུང་སྐྱོབ་དང་འཛུགས་སྐྲུན། རྩྭ་ས་བེད་སྤྱོད་བཅས་བྱ་བ་ལེགས་པོར་བསྒྲུབ་པར་ཚན་རིག་གི་གཞི་འཛིན་ས་འདོན་སྤྲོད་བྱེད་པའི་ཆེད་ཡིན།

མ་དངུལ་བཏང་ནས་རྩྭ་ས་འཛུགས་སྐྲུན་བྱེད་མཁན་གྱི་ཁེ་དབང་ལ་རྒྱལ་ཁབ་ཀྱིས་ཇི་ལྟར་སྲུང་སྐྱོབ་བྱེད་པ་ཡིན། 

རྒྱལ་ཁབ་ཀྱིས་སྡེ་ཚན་དང་མི་སྒེར་གྱིས་མ་དངུལ་བཏང་ནས་རྩྭ་ས་འཛུགས་སྐྲུན་བྱེད་པར་སྐུལ་བསྟོད་བྱས་ནས། “སུས་མ་དངུལ་བཏང་ན་དེར་ཕན་ཁེ་ཐོབ་པའི”རྩ་དོན་ལྟར། མ་དངུལ་བཏང་ནས་རྩྭ་ས་འཛུགས་སྐྲུན་བྱེད་མཁན་གྱི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་པ་ཡིན། 

རིམ་པ་སོ་སོའི་མི་དམངས་སྲིད་གཞུང་གིས་རོང་འབྲོག་པར་རོགས་སྐྱོར་དང་སྐུལ་བསྟོད། ཁྲིད་སྟོན་བྱས་ནས་རྩྭ་ས་འཛུགས་སྐྲུན་གྱི་བྱེད་སྒོ་གང་དག་སྤེལ་དགོས། 

རྫོང་རིམ་པ་ཡིན་གྱི་མི་དམངས་སྲིད་གཞུང་གིས་རོང་འབྲོག་པར་རོགས་སྐྱོར་དང་སྐུལ་བསྟོད། ཁྲིད་སྟོན་བྱས་ནས་རྩྭ་ར་བསྐོར་བ་དང་། གཟན་རྩྭ་གཟན་ཆས་གསོག་ཉར། ཕྱུགས་སྤྱིལ། འབྲོག་པའི་གཏན་སྡོད་ཁང་བ་སོགས་ཐོན་སྐྱེད་དང་འཚོ་བའི་སྒྲིག་བཀོད་འཛུགས་སྐྲུན་བྱེད་དགོས། དེ་དང་ཆབས་ཅིག་རྒྱལ་ཁབ་ཀྱིས་ད་དུང་མིའི་ཐབས་ཀྱིས་རྩྭ་ས་འཛུགས་སྐྲུན་དང་རང་བྱུང་རྩྭ་ས་ལེགས་སྒྱུར། གཟན་རྩྭ་གཟན་ཆས་རྟེན་གཞི་འཛུགས་སྐྲུན། མི་ཕྱུགས་ཀྱི་བཏུང་ཆུ་སྒྲིག་བཀོད། རྩྭ་སོན་རྟེན་གཞི་སོགས་རྨང་གཞིའི་སྒྲིག་བཀོད་འཛུགས་སྐྲུན་བྱས་ནས། རྩྭ་སའི་ཐོན་སྐྱེད་ནུས་པ་བརྟན་འཇགས་དང་མཐོར་འདེགས་གཏོང་བ་དང་། རོང་འབྲོག་པའི་ཐོན་སྐྱེད་དང་འཚོ་བའི་ཆ་རྐྱེན་ཇེ་ལེགས་སུ་གཏོང་དགོས། 

རོང་འབྲོག་པས་རྩྭ་ར་སོགས་རྨང་གཞིའི་སྒྲིག་བཀོད་སྲུང་སྐྱོབ་བཟང་བོ་བྱེད་དགོས་དོན་ཅི་ཡིན། 

རྩྭ་ར་ནི་རྩྭ་ས་སྲུང་སྐྱོབ་བྱེད་པའི་རྨང་གཞིའི་སྒྲིག་བཀོད་གལ་ཆེན་ཡིན། ཐོག་མར། རྩྭ་ར་བསྐོར་ན་རོང་འབྲོག་པས་འགན་གཙང་ལེན་བྱས་པའི་རྩྭ་སའི་ས་མཚམས་གསལ་འབྱེད་བྱེད་ཐུབ་པས། རྩྭ་ས་རྩོད་གླེང་ཇེ་ཉུང་དུ་གཏོང་བར་གལ་འགངས་ཆེ། གཉིས་ནས་རྩྭ་ར་བསྐོར་བ་ནི་ཕྱུགས་འཚོ་བ་གཏན་འགོག་དང་ཕྱུགས་འཚོ་མཚམས་འཇོག་པ། ས་ཁག་བགོས་ནས་ཕྱུགས་འཚོ་རེས་བྱེད་པའི་རྨང་གཞི་ཡིན་པས། རྩྭ་ཐང་གི་སྔོ་ཁེབས་སླར་གསོ་དང་རྩྭ་ས་ལུགས་མཐུན་གྱིས་བེད་སྤྱོད་པར་ནུས་པ་གལ་ཆེན་ལྡན། ཉེ་བའི་ལོ་འགའི་རིང་ལ། རྒྱལ་ཁབ་ཀྱིས་རོང་འབྲོག་པའི་ཐོན་སྐྱེད་དང་འཚོ་བའི་ཆ་རྐྱེན་ཇེ་ལེགས་སུ་གཏོང་ཆེད། མ་དངུལ་འབོར་ཆེན་བཏང་ནས་རོང་འབྲོག་པས་རྩྭ་ར་བསྐོར་བར་རོགས་རམ་བྱས་པ་རེད། རོང་འབྲོག་པས་རྩྭ་རའི་སྒྲིག་བཀོད་སྲུང་སྐྱོབ་བཟང་བོ་བྱེད་དགོས་པ་ལས། རང་དགར་གཏོར་བརླག་བཏང་མི་ཆོག དེ་ལས་ལྡོག་ཚེ་དངུལ་ཆད་གཅོད་ངེས་ཡིན། དེ་དང་ཆབས་ཅིག་རོང་འབྲོག་པས་མི་གཞན་པས་རྩྭ་རར་གཏོང་བརླག་བྱེད་བཞིན་པ་མཐོང་ཚེ། འཕྲལ་དུ་དེར་བཀག་འགོག་བྱེད་དགོས་པ་མ་ཟད། དུས་ཐོག་ཏུ་ས་དེའི་རྩྭ་ས་ལྟ་སྐུལ་དོ་དམ་སྡེ་ཁག་ལ་ཡར་ཞུ་བྱེད་དགོས། 

རོང་འབྲོག་པར་མགོ་བསྐོར་ཐེབས་ནས་རྩྭ་སོན་རྫུན་མ་ཉོས་ཚེ། སྡེ་ཁག་གང་བཙལ་ནས་ཐག་གཅོད་བྱེད་དུ་འཇུག་དགོས། 

རོང་འབྲོག་པར་མགོ་བསྐོར་ཐེབས་ནས་རྩྭ་སོན་རྫུན་མ་ཉོས་ཚེ། དུས་ཐོག་ཏུ་ས་དེའི་རྩྭ་ས་གཙོ་གཉེར་སྡེ་ཁག་ལ་ཞུ་དགོས། རྩྭ་ས་གཙོ་གཉེར་སྡེ་ཁག་གིས་རྩྭ་སོན་རྫུན་མ་ཚོང་གཉེར་བྱེད་མཁན་གྱི་ཁེ་ལས་ལ་བརྟག་དཔྱད་བྱེད་དགོས། གལ་ཏེ་བདེན་དཔང་ཁུངས་བཙལ་ན། དེར་དངུལ་ཆད་གཅོད་པ་དང་རྩྭ་སོན་ཚོང་གཉེར་ཆོག་འཐུས་ལག་ཁྱེར་རྩིས་མེད་དུ་བཏང་ཆོག་པ་མ་ཟད། བཟོ་ཚོང་སྡེ་ཁག་ལ་དེའི་ཁེ་ལས་བདག་གཉེར་ལག་ཁྱེར་རྩིས་མེད་དུ་གཏོང་བའི་རེ་བ་ཞུ་ཆོག ཁེ་ལས་དེས་རོང་འབྲོག་པའི་རྩྭ་སོན་ཉོ་སྤྱད་རིན་དངུལ་དང་འབྲེལ་ཡོད་འགྲོ་གྲོན། ཐོབ་སྲིད་པའི་ཁེ་ཕན་བཅས་འདུས་པའི་གྱོང་གུད་ཀྱི་སྐྱིན་ཚབ་འཇལ་དགོས། 

གོང་མ།:null
འོག་མ།:རྩྭ་ཐང་གི་བཅའ་ཁྲིམས་ཁྲིམས་སྲོལ་ཤེས་བྱ།
 གསར་འཛུགས་གནས་ཚུལ།
རྨ་ལྷོ་ཁུལ་གྱིས་ཁྲིམས་སྐྱོང་'  
ཐུན་རིན་རྫོང་གིས་རེབ་གོང་དམང'  
ཉི་འོད་སྟོང་ལྡན་གྱི་ལུས་རྩལ་'  
རྨ་ལྷོ་ཁུལ་གྱིས་རྣམ་གྲངས་བརྒ(  
རྨ་ལྷོ་ཁུལ་གྱིས་སློབ་ཁྲིད་ཀྱ'  
དེ་ལས་མང་བ།
 དཔེ་བཟང་མཚོན་བྱེད།
མི་རིགས་མཐུན་སྒྲིལ་གྱི་མེ་ཏོ'  
ཧི་ནན་རྩྭ་ཐང་ནས་བརྩེ་སེམས་ཀྱ'  
ལོ་ངོ་སྟོང་ཕྲག་རིང་གི་བོད་སྤ'  
རེབ་གོང་སྟག་ཡན་སྲོལ་རྒྱུན་ཨར&  
སྐྱེ་ཁམས་ཁོར་ཡུག་ལ་བཅངས་པའི་'  
དེ་ལས་མང་བ།
གཞན་གྱི་དགེ་མཚན་ཆུང་ངུ་།
མང་ཚོགས་ཀྱི་ལྟ་བ་དང་མང་ཚོགས་'  
མཐོ་རིམ་སློབ་གསོ་དང་ལས་རིགས་'  
མཚོ་ནུབ་སོག་བོད་རང་སྐྱོང་ཁུལ&  
མཚོ་ནུབ་ཁུལ་གྱིས་བྱེད་ཐབས་སྣ&  
མཚོ་སྔོན་ཞིང་ཆེན་རྨ་ལྷོ་བོད་'  
དེ་ལས་མང་བ།
  པར་རིས་གསར་འགྱུར།
ཞིང་ཆེན་དང་ཁུལ་རྫོང་རིམ་པ་སོ&
གཅན་ཚ་རྫོང་གིས་རྣམ་པ་ཀུན་འཛོ'
དེ་ལས་མང་བ།